ମୁମ୍ବାଇ: ମୁମ୍ବାଇର ପାୟଧୁନି ଅଞ୍ଚଳରୁ ଏକ ଅତ୍ୟନ୍ତ ନିନ୍ଦନୀୟ ତଥା ହୃଦୟବିଦାରକ ଘଟଣା ସାମ୍ନାକୁ ଆସିଛି। ଏଠାରେ ଏକ ବିଲ୍ଡିଂରେ କାର୍ଯ୍ୟରତ ଜଣେ ୱାଚମ୍ୟାନ୍ (ଜଗୁଆଳି) ଜଣେ ୭ ବର୍ଷର ନିଷ୍ପାପ ନାବାଳିକାକୁ ନିଜର ପାଶବିକ ଲାଳସାର ଶିକାର ବନାଇଛି। ଆରୋପୀ ଶୌଚାଳୟ ଭିତରେ ନାବାଳିକା ସହ ଏହି ଜଘନ୍ୟ କାଣ୍ଡ ଭିଆଇଛି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି ଏବଂ ଶତାଧିକ ଲୋକ ପୋଲିସ ଥାନା ସମ୍ମୁଖରେ ଜୋରଦାର ବିରୋଧ ପ୍ରଦର୍ଶନ କରିଛନ୍ତି। ତେବେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତକୁ ଗିରଫ କରିଛି। ବର୍ତ୍ତମାନ ପୀଡ଼ିତା ନାବାଳିକା ଜଣକ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।

ଶୌଚାଳୟରେ ଜଘନ୍ୟ ଅପରାଧ:-

​ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ଜଣକ ପାୟଧୁନି ସ୍ଥିତ ଏକ ଗୋଦାମରେ ୱାଚମ୍ୟାନ୍ ଭାବେ କାମ କରୁଥିଲା। ସେ ଶୌଚାଳୟ ଭିତରକୁ ନେଇ ନିଷ୍ପାପ ଶିଶୁ କନ୍ୟା ସହ ଏହି ବର୍ବର ଯୌନ ନିର୍ଯାତନା ଦେଇଥିଲା। ଘଟଣା ସମ୍ପର୍କରେ ଜଣାପଡ଼ିବା ମାତ୍ରେ ପୀଡ଼ିତା ନାବାଳିକାକୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି, ଯେଉଁଠାରେ ତାଙ୍କର ଚିକିତ୍ସା ଚାଲିଛି।

ଥାନା ବାହାରେ ଫାଟିଲା ଲୋକଙ୍କ ଆକ୍ରୋଶ:-

ଏହି ବର୍ବରତା ଖବର ପ୍ରସାରିତ ହେବା ମାତ୍ରେ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା। ଶତାଧିକ ଲୋକ ପାୟଧୁନି ପୋଲିସ ଥାନା ବାହାରେ ଏକତ୍ରିତ ହୋଇ ଅଭିଯୁକ୍ତ ବିରୋଧରେ କଠୋରରୁ କଠୋର କାର୍ଯ୍ୟାନୁଷ୍ଠାନ ଦାବି କରି ନାରାବାଜି କରିଥିଲେ। ବିକ୍ଷୋଭକାରୀମାନେ ଥାନା ବାହାରେ ଥିବା ମୁଖ୍ୟ ରାସ୍ତାକୁ ଅବରୋଧ କରିଦେଇଥିଲେ, ଯାହା ଫଳରେ ଯାତାୟାତ ବାଧାପ୍ରାପ୍ତ ହୋଇଥିଲା।

ଉତ୍ତେଜନାପୂର୍ଣ୍ଣ ପରିସ୍ଥିତିକୁ ଦୃଷ୍ଟିରେ ରଖି ଯେତେବେଳେ ମହାରାଷ୍ଟ୍ର ବିଧାନସଭା ବାଚସ୍ପତି ରାହୁଲ ନାର୍ଭେକର ସ୍ଥିତି ଅନୁଧ୍ୟାନ କରିବା ପାଇଁ ପାୟଧୁନି ଥାନାରେ ପହଞ୍ଚିଥିଲେ, ଉତ୍ତ୍ୟକ୍ତ ବିକ୍ଷୋଭକାରୀମାନେ ତାଙ୍କୁ ମଧ୍ୟ ଘେରି ଯାଇ ନ୍ୟାୟ ଦାବି କରିଥିଲେ। ତେବେ ଉପସ୍ଥିତ ଥିବା ପୋଲିସ ଫୋର୍ସ ବିକ୍ଷୋଭକାରୀଙ୍କୁ ବୁଝାସୁଝା କରି ରାସ୍ତାରୁ ହଟାଇବା ସହ ଅଞ୍ଚଳରେ ଶାନ୍ତି ଶୃଙ୍ଖଳା ଫେରାଇ ଆଣିଥିଲେ। କୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ସମଗ୍ର ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି।

​ପକ୍ସୋ (POCSO) ଆକ୍ଟ ଅଧୀନରେ ମାମଲା ରୁଜୁ :-

​ମୁମ୍ବାଇ ପୋଲିସ ସାଉଥ୍ ଜୋନ୍-୩ ର ଡିସିପି ବିଜୟକାନ୍ତ ମଙ୍ଗେଶ ସାଗର ଏହି ଘଟଣାକୁ ନିଶ୍ଚିତ କରି କହିଛନ୍ତି ଯେ, ଅଭିଯୋଗ ମିଳିବା ମାତ୍ରେ ପୋଲିସ ଅଭିଯୁକ୍ତ ୱାଚମ୍ୟାନ୍‌କୁ ହେପାଜତକୁ ନେଇଛି। ଅଭିଯୁକ୍ତ ବିରୋଧରେ ପକ୍ସୋ (POCSO) ଆକ୍ଟ ଏବଂ ଅନ୍ୟାନ୍ୟ ସମ୍ପୃକ୍ତ ଦଫାରେ ମାମଲା ରୁଜୁ କରାଯାଇଛି। ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଚାଲିଛି ଏବଂ ଗିରଫ ଅଭିଯୁକ୍ତକୁ ଆସନ୍ତାକାଲି କୋର୍ଟରେ ହାଜର କରାଯିବ। ପ୍ରାଥମିକ ସୂଚନା ଅନୁଯାୟୀ, ଅଭିଯୁକ୍ତ ଜଣକ ପାୟଧୁନିର ଏକ ଗୋଦାମରେ ଜଗୁଆଳି ଭାବେ କାମ କରୁଥିଲା। ଅନ୍ୟପଟେ, ପୀଡ଼ିତା ଶିଶୁ କନ୍ୟା ଜଣକ ବର୍ତ୍ତମାନ ଡାକ୍ତରଖାନାରେ ଚିକିତ୍ସିତ ଅଛନ୍ତି।